VOV4.Jarai - Tlam mơmŏt lơ 20/12, ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ hơmâo mông bưp ƀing khua sang anih jưh, khua mua anom bruă pơtom hiăp Việt Nam pơ tač rơngiao glăi Jơnum bruă pơtom hiăp tal 31. Amăng mông bưp, Khua git gai pơ ala mơnuih ƀon sang dêh čar ơi Vương Đình Huệ lăi pơthâo hăng gơnong bruă pơtom hiăp kah hăng anom bruă pơ ala brơi bruă pơtom hiăp kơ bruă mă pơ tač rơngiao, đa hơmâo anom bruă ataih mơng lŏn ia.

Khua git gai pơ ala mơnuih ƀon sang dêh čar bưp khua sang anih jưh, khua anom bruă pơtom hiăp Việt Nam

Amăng hrơi blan laih rơgao, khua sang anih jưh pơ ala dêh čar hăng hơdôm anom bruă pơtom hiăp dêh čar Việt Nam pơ tač rơngiao bưp tơnap tap yua klin Covid-19. Khua pơ ala mơnuih ƀon sang dêh čar, Jơnum min apăn bruă Khua pơ ala mơnuih ƀon sang dêh čar hrŏm hăng Ping gah, Kơnuk kơna ăt đing nao biă mă kơ bruă đĭ tui prăk apah brơi kơ mơnuih apăn bruă kah hăng tuh pơ alin man pơkra sang anih jưh, anom bruă pơtom hiăp Việt Nam pơ tač rơngiao. Samơ̆, lu anih ăt dŏ tơnap tap, glêh glar. Amăng hrơi blan anun, ƀing khua sang anih jưh, khua mua pơ ala brơi anom bruă pơtom hiăp Việt Nam pơ tač rơngiao ăt gir run găn rơgao tơnap tap kiăng kơ pơgiong djop bruă jao.

Siu Đoan: Pơblang