VOV4.Jarai - Amăng hơdôm hrơi nao čuă sit nik dêh čar Hàn Quốc, mơguah lơ 15/12/2021, Khua git gai pơ ala mơnuih ƀon sang dêh čar ơi Vương Đình Huệ hơmâo bưp Khua grup prăk kak Hana Kim Jung-tai. Anai lĕ dua bruă rơnuč, pơđut hiam klă tal nao čuă sit nik dêh čar Hàn Quốc mơng Khua git gai pơ ala mơnuih ƀon sang dêh čar ơi Vương Đình Huệ hăng Khua mua pơprong mơng dêh čar Việt Nam. Amăng mông mă bruă hăng Amkor Technology, Khua git gai pơ ala mơnuih ƀon sang dêh čar ơi Vương Đình Huệ pơpŭ kơ grup hơmâo jao hră tŭ yap tuh pơ alin amăng akŏ bruă man pơdong sang mă dưm truă hăng yua lông lăng gơnam măi mok ƀơi tơring čar Bắc Ninh hăng rơnoh prăk tuh pơ alin truh pơ 1 klai 600 klăk đôlar Mi. Khua git gai pơ ala mơnuih ƀon sang dêh car ơi Vương Đình Huệ lăi pơtong, Việt Nam dong yua hăng ƀuăn amra hrŏm hăng Grup Amkor Technology amăng bruă pok pơhai ngă tui hăng pơphun akŏ bruă , ngă gêh gal kiăng grup anai tŭ pơ alin pơđĭ kyar bruă bơwih ƀong sĭ mơdrô hơđong ƀơi Việt Nam.

Amăng mông bưp grup prăk kak Hana (Hana Finacial Group), Khua git gai pơ ala mơnuih ƀon sang dêh čar ơi Vương Đình Huệ rơkâo Hanabank tŏ tui djru brơi amăng bruă wai lăng, hơdôm hơdră bruă bơwih ƀong sĭ mơdrô phrâo mă yua boh thâo măi mok, pơtrut hơdôm anom bruă ƀơi Hàn Quốc pok prong tuh pơ alin ƀơi Việt Nam.

Siu Đoan: Pơblang