VOV4.Jarai - Amăng hơdôm hrơi nao čuă sit nik India, Khua git gai pơ ala mơnuih ƀon sang dêh čar ơi Vương Đình Huệ bưp khua mua hơdôm Grup, kông ti pơprong ƀơi dêh čar India. Bưp yă Roshni Nadar Malhotram, khua Khul wai lăng kông ti boh thâo măi mok HCL lĕ đah kơmơi pơdrong asah hloh ƀơi India hăng dong amăng 100 čô đah kơmơi hơmâo kơdrưh hloh tui hăng hră jŭ yap mơng Forbes thun 2019. Amăng mông bưp khua mua Kông ti boh thâo măi mok HCL, khua git gai pơ ala mơnuih ƀon sang dêh čar ta ơi Vương Đình Huệ pơpŭ kơ HCL jing sa amăng klâo kông ti boh thâo măi mok prong hloh ƀơi dêh čar India; laih dong hok mơ-ak hăng dong yua hơdôm bruă bơwih ƀong sĭ mơdrô mơng Grup anai ƀơi Việt Nam, sit biă ñu amăng bruă boh thâo măi mok hăng pơtô mơnuih mă bruă thâo rơgơi. Bưp mơnuih pơdrong asah Prakash Hinduja, Grup Hinduja, sa amăng hơdôm kông ti sang anŏ prong hloh amăng rŏng lŏn tơnah, Khua git gai pơ ala mơnuih ƀon sang dêh čar ơi Vương Đình Huệ brơi thâo, bruă tuh pơ alin mơng India nao pơ Việt Nam ăt dŏ ƀiă đôč pơhmu hăng tơlơi gal, tơlơi pơkôl mơng dua bơnah; čang rơmang tal nao čuă sit nik pơ India anai hrŏm hăng ding kơna mơng Kơnuk kơna, ding jum, gơnong bruă amra pơsur tuh pơ alin lu ƀiă dong mơng India pơ dêh čar Việt Nam.

Siu Đoan: Pơblang