VOV4.Jarai - Tŏ tui hơdôm hrơi bưp mơnuih ƀon sang tơdơi kơ jơnum, mơguah lơ 17/11, ƀơi kuận Hải An, ƀôn prong Hải Phòng, Khua git gai pơ ala mơnuih ƀon sang dêh čar ơi Vương Đình Huệ hrŏm hăng ƀing khua mua pơ ala mơnuih ƀon sang ƀôn prong Hải phòng bưp mơnuih ƀon sang kiăng kơ lăi pơthâo hơdôm boh tơhnal amăng jơlan lok 2, Khua pơ ala mơnuih ƀon sang dêh čar tal XV hăng hơdôm bruă mă mơng Khua mua pơ ala mơnuih ƀon sang ƀôn prong Hải Phòng amăng tal jơnum anai. Pơ ala Khua mua pơ ala mơnuih ƀon sang, kơ-iăng Khua grup khua mua pơ ala mơnuih ƀon sang ƀôn prong Hải Phòng Lã Thanh Tân lăi pơthâo brơi mơnuih ƀon sang hơdôm boh tơhnal mơng jơnum lok 2, Khua pơ ala mơnuih ƀon sang dêh čar tal XV.

Lăng yôm hơdôm tơlơi rơkâo, pơgôp hiăp mơng mơnuih ƀon sang bơdjơ̆ nao hơdôm bruă, Khua git gai pơ ala mơnuih ƀon sang dêh čar ơi Vương Đình Huệ rơkâo Khul pơ ala mơnuih ƀon sang, Jơnum min mơnuih ƀon sang ƀôn prong Hải Phòng lơ̆m đing tơngia hmư̆ tơlơi rơkâo, pơgôp hiăp djơ̆ hăng tơlơi glăm ba amăng bruă jao. Khua mua pơ ala mơnuih ƀon sang ƀôn prong amra pơƀut glăi, lăi pơthâo Khua pơ ala mơnuih ƀon sang dêh čar hơdôm tơlơi rơkâo đĭ hơdôm anom bruă bơdjơ̆ nao amăng Ƀirô Khua pơ ala mơnuih ƀon sang dêh čar . Hơdôm tơlơi rơkâo đĭ djơ̆ hăng bruă jao amăng Kơnuk kơna, Khua mua pơ ala mơnuih ƀon sang ƀôn prong Hải Phòng amra rơkâo Kơnuk kơna pơsir hĭ.

Siu Đoan: Pơblang