VOV4.Jarai - Tŭ ư hăng tơlơi jak iâu mơng Khua git gai pơ ala mơnuih ƀon sang dêh čar Phần Lan Anu Vehvilainen, Khua git gai pơ ala mơnuih ƀon sang dêh čar ơi Vương Đình Huệ hăng ƀing khua mua pơprong mơng dêh čar Việt Nam nao čuă sit nik dêh čar Phần Lan mơng lơ 10-11/9. Mơguah lơ 10/9, ƀơi plơi prong jưh jom Helsinki, Khua git gai pơ ala mơnuih ƀon sang dêh čar Phần Lan Anu Vehvilainen hơmâo git gai mông čơkă sit nik Khua git gai pơ ala mơnuih ƀon sang dêh čar ta ơi Vương Đình Huệ.

Tơdơi kơ mông čơkă, ơi Vương Đình Huệ hăng Anu Vehvilainen hăng Khua mua pơprong mơng dua bơnah mut nao jơnum bơkơtuai. Amăng mông jơnum, dua bơnah brơi thâo, tơlơi rô nao rai kơplah wah Ƀirô Khua pơ ala mơnuih ƀon sang dêh čar dua bơnah dưi tŏ tui hiam klă na nao hluai tui mông pơbưp nao rai kơplah wah khua mua hăng hơdôm anom bruă mơng Ƀirô Khua pơ ala mơnuih ƀon sang dêh čar. Dua bơnah hơmâo gum hrŏm ba boh pơhiăp hăng gơgrong amăng bruă tô nao rai kơplah wah EU hăng ASEAN kah hăng hơdôm hơdră bruă mơ̆ dua bơnah lĕ ding kơna, hăng hơdôm bruă mơ̆ dua bơnah hơmâo tơlơi pơmĭn hrŏm anun lĕ tơlơi yôm mơng hơdră ngă hrŏm djop bơnah kiăng pơtrut rơnuk rơnua, tơlơi dưi ană mơnuih hăng pơđĭ kyar hơđong kjăp.

Siu Đoan: Pơblang