VOV4.Jarai - Ƀrô tal nao čuă sit nik dêh čar India, Khua git gai pơ ala mơnuih ƀon sang dêh čar ơi Vương Đình Huệ hrŏm hăng grup khua pơ ala mơnuih ƀon sang dêh čar ta nao čuă khua mua, mơnuih mă bruă mơng Sang anih jưh pơ ala Việt Nam ƀơi India, bưp mơnuih ƀon sang Việt Nam dŏ hơdip ƀơi India. Ră ruai tom hăng ƀing khua apăn bruă, mơnuih ngă bruă mơng Sang anih jưh pơ ala Việt Nam ƀơi India, mơnuih ƀon sang Việt Nam ƀơi India, Khua git gai pơ ala mơnuih ƀon sang ơi Vương Đình Huệ pơsit neh met wa kah hăng drah kơtăk ƀu dưi pơčlah ôh, biă ñu lĕ hơdră ngă bruă Gum pơgôp abih bang mơnuih ƀon sang mơng Ping gah hăng Kơnuk kơna tui Tơlơi pơtrun 36 hăng Tơlơi pơčrâo trun 45 mơng Ding jum kơđi čar kơ bruă mă mơng mơnuih Việt Nam ƀơi čar rơngiao. Thun blan pơ anăp anai, Ƀirô khua pơ ala mơnuih ƀon sang dêh čar, Kơnuk kơna amra git gai hơdôm anom bruă bơdjơ̆ nao ngă giong tơlơi phiăn, pơplih ming dong bruă ngă hră pơ-ar, kiăng hơmâo tơlơi phiăn djơ̆ hrŏm, dưm kơnar kơ bruă wai lăng, ngă tui tơlơi phiăn kơ mơnuih Việt Nam dŏ pơ čar rơngiao. Khua git gai pơ ala mơnuih ƀon sang dêh čar čang rơmang, amăng thun blan pơ anăp amra ƀuh tơlơi pơplih phrâo prong amăng tơlơi rô nao rai dua bơnah, ăt kah hăng ƀuh tơlơi dưi ngă prong hloh mơng abih bang khua mua, mơnuih mă bruă ƀơi sang anih jưh ăt kah hăng mơnuih ƀon sang dêh čar ta ƀơi India.

Siu H’Mai: Pơblang