VOV4.Jarai - Tŏ tui bruă mă amăng tal nao čuă sit nik Hàn Quốc, Khua git gai pơ ala mơnuih ƀon sang dêh čar ơi Vương Đình Huệ hơmâo nao jơnum bơkơtuai hăng hơdôm anom bơwih ƀong sĭ mơdrô pơprong ƀơi dêh čar Hàn Quốc yua kông ti Kim&Chang pơphun. Đĭ pơhiăp amăng mông jơnum, Khua git gai pơ ala mơnuih ƀon sang dêh čar ơi Vương Đình Huệ pơsit tong, tơlơi rô nao rai kơplah wah Việt Nam-Hàn Quốc glăk amăng thun blan pơđĭ kyar hiam klă hloh hăng glăk prap lui tal hơdor glăi 30 thun hrơi akŏ pơjing bruă pơtom hiăp thun 2022. Amăng hơdôm hrơi nao čuă anai, Khua git gai pơ ala mơnuih ƀon sang dêh čar ơi Vương Đình Huệ brơi thâo, hơmâo nao lăng bruă kĭ pơkôl hăng jao 27 hră tŭ yap, hơdôm tơlơi pơkôl tuh pơ alin kơplah wah hơdôm anom bơwih ƀong sĭ mơdrô, ƀon lan dua bơnah hăng nua ñu giăm 10 klai đôlar Mi, tơlơi anai him lăng amra ba glăi tơlơi pơplih phrâo amăng tuh pơ alin, sĭ mơdrô kơplah wah dua boh dêh čar pơ anăp anai. Amăng mông jơnum bơkơtuai, khua mua mơng anom bơwih ƀong sĭ mơdrô Hàn Quốc rơkâo pơtrut sĭ mơdrô braih mơng dêh čar Việt Nam; čang rơmang pel ĕp hơdôm hơdră bruă mơng Việt Nam amăng pơđĭ kyar pơkra rơdêh ôtô pơđuăi hăng apui lơtrik; rơkâo Việt Nam pok pơhai hăng mut hrŏm hăng mobile money, sang bruă prăk mă yua boh thâo phrâo; sem lăng bruă pơhrŏ trun mă jia; hơmâo hơdră djru čan prăk pơhưč hơdôm ƀon lan, pơđĭ kyar bơwih ƀong huă ƀơi ƀon lan, bơwih ƀong hrŏm…

Siu Đoan: Pơblang