VOV4.Jarai - Tlam lơ 25/8, Jơnum min pơlir hơbit khua pơ ala mơnuih ƀon sang hơdôm boh dêh čar kual Đông Nam Á tal 42 (AIPA-42) jơnum pơđut laih, pơđut 3 hrơi ngă bruă lăng nao rai amăng tivi hơdeč hmar, tŭ yua. Grup khua pơ ala mơnuih ƀon sang dêh čar Việt Nam yua Khua git gai pơ ala mơnuih ƀon sang AIPA, Khua Khul čih pơkra tơlơi phiăn Brunei Áp-đun Ra-man Tay-íp lăi rơđah, Khua mua hơmâo lăi nao laih tơlơi yôm pơphăn mơng tơlơi ngă hrŏm ƀirô khua pơ ala mơnuih ƀon sang, biă ñu hơdôm tơlơi ƀuăn mơng AIPA amăng bruă akŏ pơjing kual ASEAN rơnuk rơnua, rơngai, hơđong hăng pơdrong asah. Tơdơi kơ pơđut mông jơnum hơmâo pơphun ngă lơphet jao glăi tơlơi ngă Khua AIPA thun 2022. Dêh čar Kur sit nik ngă Khua AIPA 2022. Khua AIPA-43 lăi pơthâo, Ƀirô khua pơ ala mơnuih ƀon sang dêh čar Kur amra pơphun Jơnum Khua mua AIPA - 43 mơng lơ 12/9/2022. Samơ̆, amăng hrơi hơmâo klin Covid-19 kơtang tui anai lĕ hơdră pơphun jơnum hiư̆m pă aka ƀu thâo ôh.

Siu H’Mai: Pơblang