VOV4.Jarai-Mơguah lơ 30/11, Khua git gai pơ ala mơnuih ƀôn sang dêh čar ơi Vương Đình Huệ git gai jơnum mă bruă hăng Jơnum min Bơwih ƀong hăng grup mơnuih rơgơi kơhnâo gah prăk kăk, bruă prăk kăk ngă tui Hơdră rŭ glăi pơđĭ kyar bơwih ƀong huă-mơnuih mơnam.

Tơhnal pơkă kơ jơnum anai djru hrom ngă rơđah tơlơi mă yua prăk kăk djơ̆ hăng bruă kiăng sit nik, hrom kơnuk kơna pơkra hơdră tuh pơ alin pơkă rơnoh prăk pơkă yua amăng thun, jơlan hơdră prăk kăk ngă djơ̆ hăng jơlan hơdră pơtrun mơ̆ng ping gah, tơlơi phiăn kơnuk kơna ƀơi mông jơnum lok 4 khua mua ping gah tal XIII laih anun hră pơtrun jơnum lok 2, khua mua pơ ala mơnuih ƀôn sang dêh čar tal XV kơ bruă jŭ yap abih bang bruă pơhlôm, pơgang klin covid 19, rŭ glăi tơlơi bơwih ƀong huă, ngă bruă dŏ hrom djơ̆ găl amăng mông klin kheng ăt dŏ.

Ră anai kơnuk kơna hơmâo ngă hră čih pơkra tơlơi phiăn mă bruă, yua prăk kăk, pơblih prăk kăk djru pok pơhai hmao kru Hơdră hrom abih bang rŭ glăi hăng pơđĭ kyar bơwih ƀong huă-mơnuih mơnam.

Nay Jek : Pơblang