VOV4.Jarai - Tlam lơ 14/7, ƀơi Sang bruă khua pơ ala mơnuih ƀon sang dêh čar, Khua git gai pơ ala mơnuih ƀon sang dêh čar ơi Vương Đình Huệ hơmâo tŭ jum Khua anih jưh pơ ala dêh čar Philippines Meynardo Los Banos Montealegre rai mă tơngan, tơña bla. Pơhiăp ƀơi mông tŭ jum, ơi Vương Đình Huệ rơkâo Khua anih jưh pơ ala dêh čar Philippines amăng rơwang thun ñu ngă bruă, kiăng pơtrut ngă hrŏm hơdôm bruă yôm kơplah wah Ƀirô khua pơ ala mơnuih ƀon sang Việt Nam hăng Ƀirô khua pơ ala mơnuih ƀon sang gơnong dlông hăng gơnong yŭ Philippines; anăp nao sem lăng kĭ pơkôl ngă hrŏm kơplah wah dua ƀirô đah mơng dưi pơphun ngă hrŏm, djơ̆ hăng tơlơi rô nao rai ngă gŏp yôm kơplah wah dua boh dêh čar laih anun ngă hrŏm klă hiam kơplah wah dua Birô khua pơ ala mơnuih ƀon sang. Bơdjơ̆ nao tơlơi rơnuk rơnua ia rơsĭ Ngŏ hăng tơlơi rơnuk rơnua ƀơi ia rơsĭ, Khua git gai pơ ala mơnuih ƀon sang dêh čar ơi Vương Đình Huệ tŭ ư hăng tơlơi pơgôp hiăp mơng Khua anih jưh kiăng pơtom hiăp nao rai lu hloh, bơlăi nao rai bruă mă, tŭ ư nao rai tơlơi pơmin kơ ia rơsĭ Ngŏ tui tơlơi hơmâo pơkôl pơkă mơng ASEAN, ngă tui djŏp hăng tŭ yua DOC hăng ngă hrŏm kơjăp amăng bruă bơkơtuai COC thâo pơpŭ kơ tơlơi phiăn jar kmar, biă ñu lĕ Hră Công ước mơng Sang gum hơbit djŏp dêh čar kơ Tơlơi phiăn ia rơsĭ 1982.

Siu H’Mai: Pơblang