VOV4.Jarai - Mơguah hrơi anai, lơ 8/11, Jơnum lok 2, Khua git gai pơ ala mơnuih ƀon sang dêh čar tal 15 pơphun jơnum tal 2, pơƀut ƀơi Sang bruă Khua git gai pơ ala mơnuih ƀon sang (mơng hrơi anai lơ 8/11 truh lơ 13/11). Lăp đing nao, khua mua pơ ala mơnuih ƀon sang amra pioh 2 hrơi bơkơtuai kơ tơlơi bơwih ƀong huă - mơnuih mơnam hăng prăk kơnuk kơna. Ƀing khua ăt pioh 2 hrơi ha mơkrah pioh tơña hăng lăi glăi tơlơi tơña. Sa amăng hơdôm tơlơi yôm hloh mơng jơnum tal 2 anai lĕ Khua mua git gai pơ ala mơnuih ƀon sang pơphun tơña hăng lăi glăi tơlơi tơña. Khua dêh čar hăng 4 čô khua ding jum amra lăi glăi tơlơi tơña anun lĕ: Khua ding jum ia jrao Nguyễn Thanh Long; Khua ding jum Mơnuih mă bruă tơhan rơka hăng mơnuih mơnam Đào Ngọc Dung; Khua ding jum Man pơphô akŏ bruă hăng Tuh pơ plai Nguyễn Chí Dũng hăng Khua ding jum pơtô hăng pơjuăt Nguyễn Kim Sơn. Tơdơi kơ 4 čô khua anai lăi glăi tơlơi tơña, Khua dêh čar amra lăi pơthâo glăi kơ Khua mua git gai pơ ala mơnuih ƀon sang dêh čar hăng lăi glăi hơdôm tơlơi mơ̆ ƀing khua kiăng thâo.

Siu H’Mai: Pơblang