VOV4.Jarai-Tlam lơ 13/12, amăng tal nao čuă sit nik dêh čar Hàn Quốc, ƀơi Seoul, Khua git gai pơ ala mơnuih ƀôn sang dêh čar ta, ơi Vương Đình Huệ hăng Khua git gai pơ ala mơnuih ƀôn sang dêh čar Hàn Quốc ơi Park Byeong Seug hơmâo pơƀuh ƀô̆ mơta amăng mông jơnum bơkơtuai bruă sĭ mơdrô kơplah wah Việt Nam-Hàn Quốc.

Pơhiăp mông jơnum, Khua git gai pơ ala mơnuih ƀôn sang dêh čar ta ơi Vương Đình Huệ lăi pơtong, khua mua pơ ala mơnuih ƀôn sang Việt Nam dong yua pơđĭ tui bruă ngă giăng mah rô nao rai kơplah wah Việt Nam hăng Hàn Quốc đĭ tui yak phrâo hlom bom hloh. Jơnum pơčrông bruă sĭ mơdrô tal anai, amra jing anŏ pơtrut kơtưn ngă hrom bơwih ƀong huă dua bơnah dêh čar. Lăi pơthâo hăng ƀing ngă bruă sĭ mơdrô gah dêh čar Hàn Quốc kơ tơlơi pơhing ƀơi Việt Nam, hơdôm boh tơhnal gah Việt Nam dưi ngă amăng thun blan rơgao, ơi Vương Đình Huệ lăi pơtong atur kơ tơlơi bơwih ƀong huă mơ̆ng Việt Nam ding dăng hlăk hơđong, Kơnuk kơna Việt Nam hlăk pơkra hơdră pơkă lăng abih bang, bong glăi pơgăn klin Covid 19 tui hơdră beč bal hloh, rơnuk rơnua, pel ĕp tong ten tŭ yua tơlơi duăm ruă yua klin anai.

Akŏ thun 2022, Việt Nam amra lông ngă lăng pok glăi jơlan rơdêh por jar kmar, ngă gêh găl kơ anom bruă sĭ mơdrô dưi rô nao rai, ngă hrom bơwih ƀong huă.

Nay Jek: Pơblang