VOV4.Jarai - Tlam lơ 15/12, tui mông dêh čar India, Khua git gai pơ ala mơnuih ƀon sang dêh čar ta ơi Vương Đình Huệ hăng Khua mua prong mơng dêh čar ta nao truh laih pơ tơdron rơdêh por ling tơhan Palam, New Delhi, pơphun nao čuă sit nik dêh čar India tui tơlơi jak iâu mơng Khua git gai pơ ala mơnuih ƀon sang gơnong yŭ dêh čar India Om Birla hăng Khua git gai pơ ala mơnuih ƀon sang gơnong dlông dêh čar India Venkaiah Naidu, mơng lơ 15 truh lơ 19/12/2021. Nao čơkă khua mua mơng Việt Nam, gah India hơmâo Khua Jơnum min pơtom hiăp mơng Lưỡng viện (dua anom bruă) Shri P P Chaudhary hrŏm hăng Khua mua mơng gơnong dlông, gơnong yŭ, khua mua anom bruă pơ ala mơnuih ƀon sang dêh čar, khua wai lăng bruă čơkă tuai mơng Anom bruă khua git gai pơ ala mơnuih ƀon sang dêh čar India.

Amăng tal nao čuă sit nik dêh čar India, Khua git gai pơ ala mơnuih ƀon sang dêh čar ơi Vương Đình Huệ amra pơhiăp tom Khua git gai pơ ala mơnuih ƀon sang gơnong yŭ India, bưp Khua git gai pơ ala mơnuih ƀon sang gơnong dlông, Kơ-iăng khua mir sir India hăng Khua mir sir dêh čar India, tŭ jum Khua git gai Ping gah Cộng sản India, nao pơhmư̆ mông ngă lơphet 5 thun ngă hrŏm rô nao rai Việt Nam - India, nao lăng arăng pơdă prưng rup 50 thun dua boh dêh čar rô nao rai, čơkă ƀing khua hơdôm khul ngă giăng mah, gơyut gơyâo mơng Việt Nam, pơhmư̆ mông jơnum bơkơtuai anom bơwih ƀong.

Siu H’Mai: Pơblang