VOV4.Jarai - Ƀrô tal hơdor glăi hrơi ƀing bơwih ƀong sĭ mơdrô Việt Nam lơ 13/10, tlam lơ 7/10, ƀơi Hà Nội, Khua git gai pơ ala mơnuih ƀon sang ơi Vương Đình Huệ nao čuă VCCI hăng bưp ƀing khua mua anom bơwih ƀong sĭ mơdrô Việt Nam ƀrô tal hơdor ƀing mơnuih bơwih ƀong sĭ mơdrô Việt Nam. Đĭ pơhiăp amăng mông bưp, Khua git gai pơ ala mơnuih ƀon sang dêh čar ơi Vương Đình Huệ lăi pơtong, djop mơta hơdră bruă mơng Ƀirô Khua pơ ala mơnuih ƀon sang dêh čar, mah wŏt bruă bruă čih pơkra tơlơi phiăn, krăo lăng bruă kơđi tơlơi hăng pơsit hơdôm bruă yôm phun amăng dêh čar lêng kơ lăng mơnuih ƀon sang hăng anom bơwih ƀong sĭ mơdrô lĕ yôm hloh. Pơ ala brơi hơdôm anom bơwih ƀong sĭ mơdrô, Khul lăng yôm bruă Ƀirô Khua pơ ala mơnuih ƀon sang dêh čar, jơnum min apăn bruă Khua pơ ala mơnuih ƀon sang dêh čar hơmâo hmao tlôn pơtrun tơlơi pơsit kơ bruă djru brơi mơnuih mă bruă hăng anom bơwih ƀong sĭ mơdrô mơng Keh prăk hră pơhlôm mơnuih rơngiă bruă mă truh pơ 38 rơbâo klai prăk. Laih dong, hơmâo lu boh tơhnal, amăng anun čang rơmang Khua pơ ala mơnuih ƀon sang dêh čar pel ĕp kơ bruă čih pơkra tơlơi pơsit brơi lăi djơ̆ kiăng kơ pơhlôm djơ̆ hăng tơlơi phiăn hăng dưi mă yua mơtăm; pơtrun tañ hơdôm hơdră djru brơi anom bơwih ƀong sĭ mơdrô glăk bưp tơnap tap, bơbeč nao kơtang mơng klin Covid-19 tui hơdră amuñ tŭ mă, sit nik, lăp djơ̆ hăng hơdôm tơlơi kiăng mơng anom bơwih ƀong sĭ mơdrô, hăng hơdôm gơnong bruă laih dong dưi tŭ mă hơdôm hơdră djru mơng Kơnuk kơna.

Siu Đoan: Pơblang