VOV4.Jarai - Ƀơi plơi prong jưh jom Vienna, dêh čar Áo, Jơnum ƀing khua git gai pơ ala mơnuih ƀon sang rŏng lŏn tơnah hơmâo pơphun kơdrưh yôm, hơmâo rơbêh 100 grup khua mua mơng hơdôm boh dêh čar ding kơna hăng ƀing khua krăp lăng bruă mơng IPU. Grup khua pơ ala mơng Việt Nam yua ơi Vương Đình Huệ ngă Khua grup ba jơlan nao jơnum. Tơdơi kơ pok pơphun mông jơnum hơmâo mông Jơnum bơkơtuai abih bang yua Khua IPU hăng Khua djru čih pioh hră pơ-ar IPU git gai. Khua git gai pơ ala mơnuih ƀon sang dêh čar ta ơi Vương Đình Huệ hăng ƀing khua mơng Ƀirô git gai pơ ala mơnuih ƀon sang ƀơi rŏng lŏn tơnah hơmâo lăi nao akŏ bruă “Kiăng hơmâo pơđĭ kyar hơđong kơjăp khŏm kiăng pơƀut hloh amăng bruă hơget thơ, tơlơi yâo mơ-ak kơ mơnuih ƀon sang, pơgang ba anih hơdip ayuh hyiăng lŏn adai ƀudah pơƀut kơ bruă pơđĭ kyar tơlơi bơwih ƀong. Pơhiăp ƀơi mông jơnum anai, Khua git gai pơ ala mơnuih ƀon sang ơi Vương Đình Huệ lăi pơđĭ kyar hơđong kơjăp kiăng gơñăm nao bruă lăng ba tơlơi suaih pral kơ ană mơnuih hăng pơgang ba ayuh hyiăng lŏn dai hloh kơ bruă kơnong pơƀut pơđĭ kyar bơwih ƀong huă. Tơlơi anai lăp djơ̆ hăng tơlơi kơtưn pơđĭ kyar hơđong kơjăp truh thun 2030 mơng Sang gum hơbit djŏp dêh čar, anun lĕ ngă bơkơnar 3 mơta tơlơi bơwih ƀong huă, mơnuih mơnam hăng anih hơdip.

Siu H’Mai: Pơblang