VOV4.Jarai - Tlam lơ 21/6, ƀơi Sang bruă Khua pơ ala mơnuih ƀon sang dêh čar, Khua git gai pơ ala mơnuih ƀon sang dêh čar ơi Vương Đình Huệ hơmâo jơnum lăng nao rai mơng ataih hăng Khua git gai pơ ala mơnuih ƀon sang gơnong yŭ Japan Oshima Tadamori. Ơi Vương Đình Huệ pơsit, Việt Nam lăng Japan lĕ ƀing gŏp ngă hrŏm prong, yôm biă mă, đăo gơnang prong biă amăng hơdră pơtom hiăp mơng Việt Nam; dong yua Japan pơtrut đĭ tơlơi gơgrong ngă dêh čar prong ƀơi rŏng lŏn tơnah, pơgôp hiăp kơ tơlơi rơngai, hăng pơđĭ kyar amăng kual, hăng ƀơi rŏng lŏn tơnah.

Ƀơi mông bơkơtuai, dua bơnah tŭ ư pơbưp nao rai kiăng pơtrut đĭ tơlơi ngă hrŏm khua mua pơ ala mơnuih ƀon sang dua bơnah, biă ñu lĕ ƀing khua hlăk ai, ƀing đah kơmơi ngă khua, grup khua pơ ala ngă giăng mah; pơphun pơbưp nao rai mơnuih ƀon sang hluai tui khul grup khua mua mơng dua boh dêh čar nao čuă, ngă bruă, tuh pơ alin, pôr pơthâo rup, tơlơi gêh gal gah bruă tuai hyu ngui hăng jơnum pơƀuh nao rai gru grua boh thâo ƀơi Việt Nam.

Siu H’Mai: Pơblang