VOV4.Jarai-Ƀrô djơ̆ tal yă Marketa Pakarova Adamova dưi ruah ngă khua pơ ala mơnuih ƀôn sang gơnong yŭ dêh čar Czech, Khua git gai pơ ala mơnuih ƀôn sang dêh čar ta, ơi Vương Đình Huệ mơ-it hră bơni hơ ơč mơak hrom.  

Amăng hră mơ-it, Khua git gai pơ ala mơnuih ƀôn sang dêh čar ơi Vương Đình Huệ pơdah pran jua hok mơak ƀuh tơlơi rô nao rai ngă giăng mah gru grua mơ̆ng đưm hăng bruă ngă hrom lu mơta kơplah wah Viêt Nam hăng Czech thun blan rơgao hơmâo pơđĭ kyar kơtang, prong tui; tơlơi rô nao rai ngă hrom dua bơnah sang bruă akŏ pơjing tơlơi phiăn dêh čar ăt djă bong kjăp, pơtrut tui bruă mă ngă bơkơnar djop jơlan hơdră dua bơnah dêh čar hăng lu tơring čar ngă hrom.

Pơ anăp anai, ơi Vương Đình Huệ čang rơmang Khua pơ ala mơnuih ƀôn sang gơnong yŭ dêh čar Czech yă Adamova ăt ngă hrom kjăp, pơtrut tơlơi ngă giăng mah pŭ ƀăn dua bơnah dêh čar, dua boh anom bruă git gai pơ ala mơnuih ƀôn sang kiăng jai hrơi kjăp hăng prong tui, hơđong kjăp, tŭ yua sit nik, ba glăi boh tŭ yua kơ mơnuih ƀôn sang dua bơnah, yua tơlơi rơnuk rơnua, hing ang, podrong asah amăng kual hăng rŏng lŏn tơnah.

Nay Jek: Pơblang