VOV4.Jarai - Ngă tui jơlan hơdră bưp mơnuih ƀon sang tơdơi kơ mông jơnum blung a, Khua pơ ala mơnuih ƀon sang dêh čar tal XV, mơguah tom brơi (5/8), Khua git gai pơ ala mơnuih ƀon sang dêh čar ơi Vương Đình Huệ hăng Khul Khua mua pơ ala mơnuih ƀon sang dêh čar ƀôn prong Hải Phòng hơmâo pơphun mông bưp mơnuih ƀon sang lăng nao rai mơng ataih hăng hơdôm kuận, tơring glông, tơring kual amăng ƀôn prong Hải Phòng hăng rơbêh 200 anih lăng nao rai hrŏm hăng 5.000 čô mơnuih ƀon sang. Tŭ ư hăng lăng yôm hơdôm tơlơi lăi pơthâo kơ boh tơhnal mơng mông jơnum, mơnuih ƀon sang brơi thâo, tal jơnum blung a, Khua pơ ala mơnuih ƀon sang dêh čar tal XV hơmâo ngă tui djơ̆ tơlơi pơtô mơng Khua mir sir Hồ Chí Minh lĕ “Tơnap tap aka hơƀơ̆i, khŏm pơsir hĭ”. Khua pơ ala mơnuih ƀon sang dêh čar lêng kơ hơdeč hmar, thâo rơđah bruă mă amăng lŏn ia, thâo pơčeh, gơgrong lơ̆m pơhrua hơdôm tơlơi pơsit amăng jơnum blung a anai hăng hơdôm boh tơhnal aka ƀu hơmâo hlâo anun, ba đĭ  Kơnuk kơna, Khua dêh čar hơdôm tơlơi pơsit yôm phiăn kiăng kơ hmao tlôn git gai amăng bruă pơgang klin Covid-19. Lăi glăi tơlơi tơña mơng mơnuih ƀon sang kơ bruă pơđĭ kyar tuai čuă ngui hăng bơwih ƀong amăng kual ia rơsĭ ƀơi Bạch Long Vĩ hăng Cát Bà, Khua git gai pơ ala mơnuih ƀon sang dêh čar ơi Vương Đình Huệ brơi thâo, bruă anai yôm phăn biă mă amăng pơhlôm rơnuk rơnua lŏn ia, yua anun kiăng pơlir pơđĭ kyar bơwih ƀong huă amăng kual ia rơsĭ hăng bruă pơgang ayuh hyiăng rơhuông adai dong.

Siu Đoan: Pơblang