VOV4.Jarai - Ƀrô hrơi pơpŭ kơ ƀing nai pơtô Việt Nam lơ 2011, tlam tom brơi lơ 19/11, Khua git gai pơ ala mơnuih ƀon sang dêh čar ơi Vương Đình Huệ nao pơhmư̆ hrơi Jơnum pơphun thun hrăm phrâo 2021-2022 hăng bưp, pơpŭ kơ ƀing nai pơtô ƀơi Sang hră Đại học Y Hà Nội. Pơ ala kơ ƀing khua Ping gah, Kơnuk kơna, Khua git gai pơ ala mơnuih ƀon sang dêh čar ơi Vương Đình Huệ pơpŭ bơni hơdôm tơlơi gum pơgôp prong mơng ƀing khua, ơi ia jrao, mơnuih mă bruă amăng sang ia jrao, nai pơtô hăng čơđai sang hră gưl prong; mơnuih ƀu hŭi kơ tơlơi djai brŭ khin nao pơ anih hơmâo klin, mă bruă abih pran jua pơgang ba tơlơi hơdip rơnuk rơnua mơng mơnuih ƀon sang.

Him lăng hlâo, klin Covid-19 ăt dŏ ngă tơnap tap, ƀing ta ƀu thâo hlâo ôh, samơ̆ hăng pran jua gir run mơng abih bang djuai ania, hăng tơlơi thâo rơgơi, tơlơi pơmin pran jua kơjăp, khăng kar boh pơtâo, tơlơi thâo rơgơi apăn bruă mơng ƀing ơi ia jrao, tơlơi gum ngă hrŏm mơng abih bang anom bruă čar, Khua git gai pơ ala mơnuih ƀon sang dêh čả ơi Vương Đình Huệ đăo gơnang, lŏn ia ta amra tañ dưi pơgang klin, pơgang ba tơlơi suaih pral kơ mơnuih ƀon sang, rŭ glăi hăng pơđĭ kyar bơwih ƀong huă - mơnuih mơnam.

Siu H’Mai: Pơblang