VOV4.Jarai - Lơ 17/6, ƀơi Sang bruă khua pơ ala mơnuih ƀon sang dêh čar, ơi Vương Đình Huệ, Khua pơ ala mơnuih ƀon sang dêh čar ta jơnum mơng ataih hăng Khua Jơnum min apăn bruă pơ ala mơnuih ƀon sang dêh čar Khač (Khua git gai pơ ala mơnuih ƀon sang dêh čar) Lật Chiến Thư. Ƀơi mông jơnum, dua čô khua lêng pơsit, tơlơi yôm rô nao rai abih bang kơplah wah Việt Nam hăng Khač amăng hơdră pơtom hiăp mơng rim boh dêh čar, bơni kơ tơlơi dưi ngă amăng tơlơi rô nao rai mơng dua Ping gah, dua kơnuk kơna, biă ñu lĕ ngă hrŏm kơplah wah dua Ƀirô pơ ala mơnuih ƀon sang dêh čar amăng thun blan rơgao. Kiăng pơtrut đĭ tơlơi rô nao rai ngă gŏp amăng djŏp bruă kơplah wah Việt Nam - Khač jai hrơi dlăm tui, Khua git gai pơ ala mơnuih ƀon sang dêh čar ơi Vương Đình Huệ kiăng dua bơnah pơbưp nao rai ƀing khua pơprong, pơbưp nao rai mơnuih ƀon sang; rơkâo dêh čar Khač blơi lu hloh gơnam mơng Việt Nam, lăng ba, git gai anom bơwih ƀong dua bơnah pơsir hĭ hơdôm bruă ngă hrŏm aka ƀu rơhuaih; pơtrut ngă hrŏm ƀơi guai lŏn, pơbưp nao rai, sĭ mơdrô dua bơnah./.

Siu H’Mai: Pơblang