VOV4.Jarai - Amăng tơlơi ngă bruă ƀơi Jơnum lok 2, Khua git gai pơ ala mơnuih ƀon sang dêh čar tal 15, mơguah lơ 12/11, Khua dêh čar ơi Phạm Minh Chính hơmâo pioh 90 mơnit lăi glăi tơlơi tơña mơng ƀing khua. Anai lĕ tal blung a Khua dêh čar lăi glăi tơlơi tơña dong mơng hrơi đĭ ngă khua. Ƀơi mông pơphun tơña pơ ala kơ Kơnuk kơna, Khua dêh čar ơi Phạm Minh Chính bơni kơ ƀing khua pơ ala mơnuih ƀon sang, mơnuih ƀon sang, kư tri amăng dêh čar ta tŭ ư hrŏm, pơđing hmư̆, pơgôp hiăp lu tơlơi klă, dlăm, gơgrong bruă kơ hơdôm tơlơi lăi pơthâo glăi mơng Kơnuk kơna, biă ñu lĕ bruă pơđĭ kyar bơwih ƀong huă - mơnuih mơnam thun 2021, him lăng hlâo bruă pơđĭ kyar bơwih ƀong huă - mơnuih mơnam thun 2022 hăng thâo hluh nao rai dong yua bruă pơgang klin Covid-19. Khua dêh čar ơi Phạm Minh Chính hơmâo lăi pơthâo glăi sa dua bruă hơmâo ƀing khua hăng mơnuih ƀon sang lăp đing nao kah hăng bruă pơgang klin, biă ñu pơplih tơlơi pơmin pơgang klin tui jơlan dưi hơdip hrŏm, hơdeč hmar pơgăn tŭ yua klin Covid-19; pơhlôm tơlơi bơwih ƀong tơlơi hơdip mơnuih ƀon sang, kơ hơdôm tơlơi djru rŭ glăi tơlơi bơwih ƀong huă mơnuih mơnam.

Pơđut dua hrơi ha mơkrah tơña hăng lăi glăi tơlơi tơña mơng ƀing khua mua Kơnuk kơna, Khua git gai pơ ala mơnuih ƀon sang ơi Vương Đình Huệ lăi, Ƀirô khua pơ ala mơnuih ƀon sang hơmâo ngă bruă hơdeč hmar, pơmin nao kơ bruă kiăng pơplih phrâo; Khua mua pơ ala mơnuih ƀon sang hơmâo ngă giong laih bruă tơña hăng lăi glăi tơlơi tơña blung a mơng rơwang thun tal 15 amăng kiăo tui tơlơi dưi ană mơnuih, tơpă ară lăi pơthâo tơlơi pơmin, pơgôp hiăp kiăng klă laih anun dưi ngă truh kih laih.

Siu H’Mai: Pơblang