VOV4.Jarai - Amăng lơ 9/9, tui mông dêh čar, Khua git gai pơ ala mơnuih ƀon sang dêh čar ơi Vương Đình Huệ hăng Grup khua pơ ala mơnuih ƀon sang dêh čar Việt Nam nao pơhmư̆ Jơnum bơkơtuai anom bơwih ƀong Việt Nam - Bulgum. Pơhiăp hăng ƀing khua anom bơwih ƀong prong hloh mơng dêh čar Bulgum, ơi Vương Đình Huệ bơni biă kơ tơlơi pơmin pơphun jơnum anai, lăng anai lĕ tơlơi gêh gal kiăng bơlăi nao rai jơlan bơwih ƀong phrâo, hơdră pơplih phrâo anih bơwih ƀong mơng Việt Nam, laih dong hơmâo hơdră kiăng pơđĭ tui anŏ klă mơng bruă ngă hrŏm, anăp nao tơlơi dưi ngă truh kih mơng hơdôm anom bơwih ƀong dêh čar Bulgum lơ̆m tuh pơ plai sĭ mơdrô ƀơi Việt Nam. Kiăng pơtrut tui hloh tơlơi ngă hrŏm bơwih ƀong, sĭ mơdrô, tuh pơ plai kơplah wah Việt Nam hăng Bulgum pơ anăp anai, mơneč mă tơlơi gêh gal tơdơi abih klin Covid-19, Khua git gai pơ ala mơnuih ƀon sang dêh čar ơi Vương Đình Huệ hơmâo lăi nao hơdôm jơlan hơdră bơwih ƀong phrâo amăng hrơi blan pơ anăp. Amăng anun, rơkâo kiăng anom bơwih ƀong hăng hơdôm khul grup bơwih ƀong dêh čar Bulgum djru ba kơtang hloh kiăng Ƀirô khua pơ ala mơnuih ƀon sang dêh čar Bulgum tañ ngă pơgiong hră pơ-ar, pơsit brơi Hră pơkôl pơgang ba bruă tuh pơ plai Việt Nam hăng EU (EVIPA) amăng hrơi blan tañ hloh. Sem lăng bruă pok jơlan rơdêh por tơphă, por tơkuh nao rai dêh čar Bulgum hăng Việt Nam hlao, đah mơng pơđĭ tui tơlơi ngă hrŏm bơwih ƀong, tuai hyu ngui, pơtô hrăm, jơnum bơbưp nao rai mơnuih ƀon sang dua bơnah kiăng jê̆ giăm nao rai hloh tơdơi kơ abih klin.

Siu H’Mai: Pơblang