VOV4.Jarai - Yang hrơi dong lơ 12/9, Khua git gai pơ ala mơnuih ƀon sang dêh čar ơi Vương Đình Huệ hrŏm hăng Khua mua pơprong mơng dêh čar ta glăi truh pơ tơdrŏn rơdêh por Nội Bài, Hà Nội pơđut hĭ tal nao jơnum hrŏm hiam klă amăng jơnum Khua mua pơ ala mơnuih ƀon sang amăng jar kmar tal 5 ƀơi dêh čar Áo, nao čuă mă bruă hăng Ƀirô khua pơ ala mơnuih ƀon sang kual Mi kô̆, ƀơi dêh čar Belgium hăng nao čuă dêh čar Phàn Lan dong mơng lơ 5-11/9.

Tal nao čuă 3 boh dêh čar pơ kual Mi kô̆ mơng Khua git gai pơ ala mơnuih ƀon sang dêh čar ơi Vương Đình Huệ pơphun hiam klă

Amăng tal nao čuă mă bruă pơ 3 boh dêh čar kual Mi kô̆, samơ̆ Khua git gai pơ ala mơnuih ƀon sang dêh čar ta ơi Vương Đình Huệ hơmâo mă bruă hăng 5 boh dêh čar laih dong nao jơnum hrŏm rơbêh 70 jơnum pơbưp djop bơnah, dua bơnah. Sit biă ñu, amăng tal nao čuă anai, Kơnuk kơna Belgium hơmâo djru brơi 100.000 liều vaccine. Kơnuk kơna Slovakia djru 100.000 liều vaccine, sa, dua boh dêh čar pơkŏn ăt glăk sem lăng kơ bruă djru brơi Việt Nam vaccine hăng djru brơi gơnam măi mok pioh pơgang klin. Sa, dua khul grup, anom bruă pơ tač rơngiao, hơdôm anom bơwih ƀong sĭ mơdrô prong mơng dêh čar Việt Nam bơwih ƀong pơ tač rơngiao ăt blơi gơnam măi mok pioh pơgang klin Covid-19 djru brơi Việt Nam, hăng nua ñu rơbêh 1.028 klai prăk.

Siu Đoan: Pơblang