VOV4.Jarai - Ngă bruă hăng khua mua git gai tơring čar Vĩnh Phúc kơ boh than ba glăi mơng Tơlơi pơtrun jơnum Ping gah dêh čar tal 13 hăng Tơlơi pơtrun Jơnum Ping gah tơring čar Vĩnh Phúc tal 17, Khua git gai pơ ala mơnuih ƀon sang dêh čar Vương Đình Huệ pơsit: tơdơi kơ 25 thun, tơring čar Vĩnh Phúc hrưn đĭ kơtang biă, jing anih hmư̆ hing kơ bruă pơđĭ kyar bơwih ƀong huă mơnuih mơnam, ngă pơhưč tuh pơ plai amăng kual bơwih ƀong prong ƀơi kual Kơdư dêh čar hăng amăng dêh čar ta. Pơhiăp ƀơi mông ngă bruă, Khua git gai pơ ala mơnuih ƀon sang dêh čar ơi Vương Đình Huệ rơkâo tơring čar Vĩnh Phúc pok pơhai ngă tŭ yua Tơlơi pơtrun Jơnum ping gah dêh čar tal 13 hăng Tơlơi pơtrun jơnum Ping gah tơring čar tal 17, hơdôm tơlơi pơčrâo trun, tơlơi pơsit mơng Kơnuk kơna kơ bruă akŏ pơdong Ping gah. Pơƀut ngă bruă hơdeč hmar, tŭ yua bruă ƀrô pơgang klin rah, ƀrô pơđĭ bơwih ƀong huă - mơnuih mơnam rah, pơhlôm tơlơi suaih pral, tơlơi hơdip mơnuih ƀon sang hrŏm hăng pơƀut pơsir brơi tơlơi tơnap, tơlơi ngă gun amăng bruă pơkra gơnam sĭ mơdrô, djru ba mơnuih ƀon sang hăng anom bơwih ƀong.

Siu H’Mai: Pơblang