VOV4.Jarai -  Čơtlăm tom brơi (22/10), Khua pơ ala mơnuih ƀôn sang hmư̆ tơlơi lăi pơthâo glăi hăng bơkơtuai ƀơi Grŭp kơ tơlơi ngă tui hơdră bruă, hơdră djru hră pơgang gah mơnuih mơnam, wai lăng hăng mă yua Keh prăk pơgang mơnuih mơnam thun 2020; Bruă wai lăng hăng mă yua Keh prăk pơgang gah ia jrao thun 2020 hăng ngă tui Tơlơi pơtrun pơsit mrô 68 Khua pơ ala mơnuih ƀôn sang tal 13 kơ pơtrut kơtang ngă tui hơdră bruă, tơlơi phiăn hră pơgang gah ia jrao, anăp nao hră pơgang ia jrao abih bang mơnuih ƀôn sang amăng 2 thun 2019-2020. Yap truh abih thun 2020, mrô mơnuih gum hrom hră pơgang gah mơnuih mơnam lĕ rơbêh kơ 16 klăk čô mơnuih, dưm dưm hăng 33,5% mrô mơnuih mă bruă amăng hnưr thun. Abih bang pơhrui keh prăk pơgang gah ia jrao lĕ rơbêh kơ 110 rơbâo klai prăk; mă yua kơ bruă ia jrao thun 2020 lĕ rơbêh kơ 104 rơbâo klai; abih bang mrô pơhrui keh prăk pơgang gah ia jrao prong hloh mrô mă yua keh prăk pơgang gah ia jrao lĕ rơbêh kơ 5 rơbâo klai prăk. Tơlơi lăi pơthâo glăi pel ĕp mơng Jơnum min mơnuih mơnam rơkâo Kơnuk kơna klah čun bruă ngă tui Tơlơi pơtrun pơsit mrô 68 ngă phun than pioh ba tơbiă tơlơi rơkâo đĭ, ba tơbiă Khua pơ ala mơnuih ƀôn sang mă yua Tơlơi pơtrun pơsit djơ̆ hăng tơlơi phrâo; kơsem min jơlan gah pơđĭ tui rơnoh prăk blơi hră pơgang gah ia jrao djơ̆; hrom hăng anun črâo ba hơdôm ding jum, gơnong bruă bơdjơ̆ nao hăng plơi pla kơtưn pel ĕp, hơduah tơña bruă ngă tui hơdră bruă, tơlơi phiăn kơ hră pơgang gah ia jrao, pơsir tơpă hơdôm bruă ngă soh./.

Siu H’ Prăk: Pô pơblang