VOV4.Jarai - Ƀơi Sang adôh suang Lớn, ƀôn prong Hà Nội, hmâo pơphun ngă Lơphet pơpŭ hăng ƀơk hră pơanăn “Mơnuih ngă đang hmua rơgơi mơbruă thun 2021”. Khua git gai wai lăng pơ ala mơnuih ƀôn sang dêh čar ta ơi Vương Đình Huệ nao pơhmư̆ mông jơnum ngă lơphet pơpŭ. Amăng mông ngă lơphet, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng ƀing khua mua Git gai Ping gah, Kơnuk kơna hmâo ƀơk Kỷ niệm chương, Hră bơni pơpŭ 63 čô mơnuih ngă đang hmua rơgơi mơbruă, mơnuih pơ ala kơ hơdôm klăk čô mơnuih ngă đang hmua ba jơlan hlâo amăng đơ đam dêh čar ta.

Pơhiăp amăng mông ngă lơphet, Khua Jơnum min djop djuai ania mơnuih mơnam dêh čar Việt Nam ơi Đỗ Văn Chiến pơsit, Ping gah hăng Kơnuk kơna pơsit, bruă đang hmua, mơnuih ngă đang hmua, plơi pla jing bôh than gơgrong phun amăng bruă pơplih phrâo măi mok, pơhlih phâo rơnuk anai, pơdŏng hăng pơgang lŏn ia. Grŭp pơphun bruă ngă lơphet hmâo pơsit ƀơk Hră pơanăn Mơnuih ngă đang hmua Việt Nam rơgơi mơbruă thun 2021 kơ 63 čô mơnuih ngă đang hmua tui 5 djuai: bruă rông hlô mơnong; bruă tơjŭ pla; bruă đang blok, lu mơta, dơnao hnoh ia, akan hơdang; bruă pơkra rai gơnam tam, sĭ mơdrô gơnam tam mă mơng đang hmua; bruă pơčeh phrâo, pơplih phrâo mrô, hmâo bôh than prong amăng pơdŏng plơi pla phrâo hăng pơgang rơnuk rơnua Lŏn ia./.

Siu H’ Prăk: Pô pơblang