VOV4.Jarai -  Ƀrô djơ̆ tal nao pơhmư̆ jơnum ƀing Khua pơ ala mơnuih ƀôn sang rŏng lŏn tơnah tal 5, ƀơi Ƀirô mă bruă Sang gum hơbit djop dêh čar ƀơi Viên, dêh čar Áo, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo laih mông bưp Khua Ƀirô wai lăng apui ayuh jar kơmar (IAEA) hăng Khua Anom bruă pơ ala kơ Sang gum hơbit djop dêh čar ƀơi dêh čar Áo ơi Ra-pha-en Ma-ri-a-nô Gờ-Rốt-xi. Amăng mông tŭ jum, IAEA lăi pơtŏng amra djru brơi măi mok pơčrang lăng PCR djă hyu hăng mrô jrao lu, hmâo nua rơbêh kơ 470.000 Euro kơ dêh čar Việt Nam amăng bruă pơgang, pơgăn klin. Khua IAEA bơni Việt Nam tơbiă anăn kơ Khul Khua IAEA rơwang bruă mơng thun 2021-2023 hăng čang rơmang Việt Nam gum hơgôp dong kơ IAEA. Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo, IAEA lăi pơthâo tơlơi găn rơgao, djru bôh thâo măi mok ngă giong glông bruă tơlơi phiăn kiăng wai lăng hăng mă yua ba glăi bôh tơhnal apui ayuh pioh pơđĭ kyar bơwih ƀong, nao hrom hăng pơgang rơhuông adai lŏn mơnai hăng bŏng glăi hăng tơlơi pơplih ayuh hyiăng, djru Việt Nam pơhrăm hơdră phrâo măi mok, pơtô brơi hăng pơđĭ tui bôh thâo bruă mă yua bôh thâo măi mok put ayuh amăng bruă ia jrao, pơgang, pơgăn klin Covid-19./.

Siu H’ Prăk: Pô pơblang