VOV4.Jarai -  Lơ 6/9, ƀơi Anom sĭ mơdrô dêh čar Áo, plơi prong jưh jom Viên hmâo pơphun Bơkơtuai bruă bơwih ƀong kơplah wah Việt Nam hăng Áo yua kơ Ƀirô anih jưh pơ ala kơ Việt Nam, Ding jum kơčăo bruă hăng tuh pơ plai hăng Anom sĭ mơdrô bơwih ƀong dêh čar pơphun. Lu mơnuih bơwih ƀong Việt Nam hăng mơnuih pơ ala rơbêh kơ 20 bôh anom bơwih ƀong amăng hơdôm bruă prăk kak, sang prăk, bruă ia jrao, gum lăi pơthâo, jơlan nao rai, ô tô, măi mok pơgang rơnuk rơnua, pơgang apui ƀong, pơsir djah gah ia jrao, pơsir gơnam pơsơi, sĭ mơdrô, tơlơi phiăn, bruă bơwih gah rơdêh por, apui yua hmâo nao pơhmư̆. Pơhiăp amăng mông bơkơtuai, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, Việt Nam čang rơmang, khul bơwih ƀong mơng Áo, Anom sĭ mơdrô măi mok hmâo tơlơi pơhiăp pơtrut kiăng tañ pơsit Tơlơi pơkôl pơhlôm tuh pơplai. Ră anai, Áo hmâo 37 rơwang bruă hăng abih bang prăk tuh pơ plai hmâo năng ai ñu 150 klăk dolar Mi, đing nao biă ñu amăng hơdôm bruă măi mok pơkra pơjing hăng bôh thâo phrâo măi mok. Gah tơlơi sĭ mơdrô, Áo jing sa amăng hơdôm anih anom sĭ gơnam kơ dêh čar tač rơngiao yôm phăn hloh mơng Việt Nam hăng ră anai glăk amăng grŭp 5 bôh dêh čar sĭ gơnam kơ dêh čar tač rơngiao prong hloh mơng Việt Nam amăng Khul EU.  Khua git gai wai lăng pơ ala mơnuih ƀôn sang dêh čar ta ơi Vương Đình Huệ ăt čang rơmang mơn, anom bơwih ƀong Áo dŏng yua kiăng Kơnuk kơna Áo djru brơi vaccine, hơdôm gơnam mă yua gah ia jrao, djru Việt Nam pơgang pơgăn klin ruă./.

Siu H’ Prăk: Pô pơblang