VOV4.Jarai -  Mơguah lơ 30/9, ƀơi Sang mă bruă Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ git gai mông mă bruă lăng nao rai mơng ataih hăng Grŭp bơwih ƀong gưl dlông mơng Khul bơwih ƀong sĭ mơdrô dêh čar Mi – ASEAN.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ

Mông mă bruă dưi pơphun tui tơlơi rơkâo mơng Khul bơwih ƀong sĭ mơdrô Mi – ASEAN, dưi tô nao rai mơng ataih hăng lu anih anom jơnum lăng nao rai mơng ataih, anun lĕ: Sang mă bruă Khua pơ ala mơnuih ƀôn sang Việt Nam, plơi prong jưh jom Whasington, dêh čar Mi, Singapore, Philippine hăng ƀơi sa dua bôh dêh čar pơkon ƀơi rŏng lŏn tơnah, kiăng pơdah tơlơi pơkôl mơng kual bơwih ƀong mơnuih ƀôn sang Mi hăng bruă mă lĕ gum hrom hăng pran đăo gơnang amăng bruă pơtrut hơdôm tơhnal pơkă đing nao, biă ñu lĕ amăng pơplih mrô hăng pơđĭ kyar kơjăp mơng Việt Nam. Mông mă bruă anai dô̆ kiăng pơtrut dong tơlơi rô nao rai bơwih ƀong sĭ mơdrô, tuh pơplai kơplah wah dua bơnah hluai tui hơdôm bruă bơkơtuai hăng čih djă pioh hơdôm tơlơi rơkâo đĭ rơđah mơng hơdôm bơnah bơwih ƀong Mi pioh kơ bruă bơwih ƀong huă sĭ mơdrô tui tơlơi dưi mơng Khua pơ ala mơnuih ƀôn sang, tơlơi gum hơgôp mơng Khul hăng hơdôm bôh anom bơwih ƀong Mi pioh kơ bruă pơdŏng hơdôm hơdră bruă đing nao mơng Khua pơ ala mơnuih ƀôn sang Việt Nam, ăt kah hăng hơdôm tơlơi rơkâo mơng Việt Nam pioh kơ bruă sĭ mơdrô, tuh pơplai hăng pơhư prong tuh pơplai mơng anom bơwih ƀong Mi ƀơi Việt Nam mơn./.

Siu H’ Prăk: Pô pơblang