VOV4.Jarai - Hmư̆ tui tơlơi jak iâu mơng Khua git gai wai lăng pơ ala mơnuih ƀôn sang dêh čar Hàn Quốc Park Byeong Seung, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng Grŭp Khua pơ ala kơ Khua pơ ala mơnuih ƀôn sang dêh čar hmâo nao truh laih pơ̆ tơdrŏn rơdêh por jar kơmar Incheon, plơi prong jơh jom Seoul, pơphun tal nao čuă dêh čar Hàn Quốc mơng lơ 12-15/12.

Čơkă grŭp ƀơi tơdron rơdêh por bơnah gah Hàn Quốc hmâo Kơ-iăng Khua pơ ala mơnuih ƀôn sang giăng mah Hàn Quốc hăng Việt Nam, Khua pơ ala mơnuih ƀôn sang Suh Jung-Sook. Amăng tal nao čuă sit nik anai,  Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng Grŭp Khua pơ ala kơ Khua pơ ala mơnuih ƀôn sang dêh čar Việt Nam amra hmâo bruă bơkơtuai hăng khua git gai gưl dlông mơng Hàn Quốc; tŭ jum hơdôm khul grŭp, khua pơ ala mơng Hàn Quốc; nao pơhmư̆ mông Bơkơtuai bruă bơwih ƀong; bơkơtuai hăng ƀing khua bơwih ƀong ba jơlan hlâo; tŭ jum hơdôm anom bơwih ƀong ba jơlan hlâo ƀơi Hàn Quốc; lăng mông ngă lơphet kĭ pơkôl tơlơi bơkơtuai gum hrom mơng hơdôm ding jum, gơnong bruă, plơi pla, anom bơwih ƀong. Biă ñu, khua pơ ala kơ Kơnuk kơna dua bôh dêh čar amra kĭ Tơlơi pơkôl kơ pơgang gah mơnuih mơnam dua bơnah plơi pla kơplah wah dua bôh dêh čar./.

Siu H’ Prăk: Pơblang