VOV4.Jarai - Mơguah lơ 13/12, yap tui mông ƀơi Hàn Quốc, amăng rơwang tal nao čuă sit nik dêh čar Hàn Quốc, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo tŭ jum khua hơdôm Khul grŭp, anom bơwih ƀong ba jơlan hlâo mơng Hàn Quốc. Amăng mông tŭ jum hơdôm grŭp, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, Việt Nam hăng Hàn Quốc glăk gir run ngă brơi tơlơi rô nao rai dua bơnah truh tơhnal dlông phrâo hloh ƀrô djơ̆ tal hơdor glăi 30 thun pơdŏng bruă pơtom hiăp.

Gum hrom bơwih ƀong jing phun than yôm phăn yua anun amăng tal nao čuă anai brơi ƀuh pran pơsit pơtrut gum hrom bơwih ƀong, sĭ mơdrô dua bơnah djơ̆ tơhnal pơkă 100 klai dolar Mi amăng thun 2023. Amăng mông jơnum tŭ jum khua Grŭp Samsung Alectronics, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, Việt Nam dŏng yua kơčăo bruă pơhư prong tuh pơplai bơwih ƀong sĭ mơdrô mơng Sang bruă pơ̆ anăp anai; pơsit yôm kơčăo bruă djru anom bơwih ƀong Việt Nam gum hrom amăng hơdôm bruă gum hrom đơ đam rŏng lŏn tơnah mơng Samsung; hrom hăng anun rơkâo Sang bruă hmâo bruă mă tañ hăng jơlan gah pơsir rơđah kiăng djru hơdôm anom bơwih ƀong Việt Nam pơđĭ tui bôh thâo pơkra rai gơnam hăng bơkơtưn kiăng djop pran gum hrom hơdôm pơlir hơbit đơ đam rŏng lŏn tơnah mơng Grŭp Samsung hăng Sang bruă lăi ha jăn.

Siu H’ Prăk: Pơblang