VOV4.Jarai -  Amăng rơwang nao čuă sit nik dêh čar Phần Lan, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo bơkơtuai laih hăng Khua dêh čar Phần Lan yă Sanna Marin. Khua dêh čar Phần Lan pơsit, Việt Nam lĕ sa amăng hơdôm bơnah gum hrom yôm phăn mơng Phần Lan amăng ASEAN hăng ƀơi ASIA – Thái Bình Dương, dua bôh dêh čar hmâo gum hrom truh kih bruă bơwih ƀong, pơtô pơhrăm, gum hrom pơđĭ kyar, rơhuông adai lŏn mơnai. Dua gơñu ăt bơkơtuai mơn kơ bruă gum hrom amăng hơdôm hơdră lu bơnah, pơsit dua bôh dêh leng kơ gum hrom hăng hmâo bruă mă klă ƀơi EU hăng ASEAN, khom djă pioh dong bruă gum hrom hăng dŏng yua tơdruă, gum hrom amăng gir run hrom tô nao rai ASEAN – EU, djru hơkrŭ đĭ tơlơi rô nao rai gum hrom bruă ASEAN-EU phrâo dưi pơjing./.

Siu H’ Prăk: Pô pơblang