VOV4.Jarai - Tô̆ tui tal nao čuă dêh čar India, mơmot lơ 16/12, yap tui mông ƀơi India, ƀơi plơi prong jưh jom New Dehli, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo bơkơtuai laih hăng Khua git gai wai lăng pơ ala mơnuih ƀôn sang gơnong yŭ dêh čar India Om Birla. Amăng mông bơkơtuai, Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơdah pran jua mơ-ak lom bruă gum hrom abih bang Việt Nam hăng India hmâo găn rơgao črăn jơlan 5 thun hăng glăk pơđĭ kyar prong amăng djop bruă, biă ñu bruă kơđi čar pơtom hiăp, pơgang lŏn ia rơnuk rơnua plơi pla, sĭ mơdrô, bôh thâo hăng bơkơtuai mơnuih ƀôn sang; rơkâo dua bôh dêh čar gum hrom kơjăp dong pok pơhai Jơlan hơdră mă bruă rơwang mơng thun 2021-2023 kiăng ba glăi hơdôm bôh tŭ yua sit nik, ba glăi bôh tơhnal kơ Kơnuk kơna hăng mơnuih ƀôn sang dua bôh dêh čar. Ƀrô djơ̆ tal anai, Khua git gai wai lăng pơ ala mơnuih ƀôn sang dêh čar ta ơi Vương Đình Huệ bơni kơ tơlơi gum djru yôm phăn mơng India pioh kơ Việt Nam amăng pơgang pơgăn Covid-19; bơni hơdôm anom bơwih ƀong India pơtrut kơtang tuh pơplai ƀơi Việt Nam amăng hơdôm bruă India dưi gơgrong prong./.

Siu H’ Prăk: Pơblang