VOV4.Jarai - Hăng pran jua prăp lui mơng tañ, mơng ataih, mơng lơ 25-26/11 ƀơi Sang jơnum bruă Khua pơ ala mơnuih ƀôn sang dêh čar ta, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng ƀing Kơ-iăng Khua git gai wai lăng pơ ala mơnuih ƀôn sang dêh čar ta mă bruă hăng Khua čih pioh Khua pơ ala mơnuih ƀôn sang, Khua Anom bruă Khua pơ ala mơnuih ƀôn sang, Khua sa dua Jơnum min mơng Khua pơ ala mơnuih ƀôn sang, Khua mua sa dua Ding jum, gơnong bruă dêh čar kiăng pel ĕp 5 mơta tơlơi kiăng ječ, pơkă hlâo dưi ba tơbiă bơkơtuai amăng tal jơnum ƀu hmâo pơkă hlâo mơng Khua pơ ala mơnuih ƀôn sang. Pơhiăp amăng mông mă bruă, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, anai lĕ hơdôm bôh yôm hmâo tơhnal ječ, kiăng hmâo lom kiăng, yôm phăn biă kơ hơdră bruă pioh kơ tơlơi hơdip mơda mơnuih ƀôn sang, samơ̆ ăt lĕ tơlơi tơnap, kiăng prăp lui tŏng ten, djơ̆ glông jơlan, tơlơi pơkă amăng tơlơi phiăn. Hơdôm bôh ƀirô mơng Khua pơ ala mơnuih ƀôn sang hăng Kơnuk kơna kiăng gum hrom prăp lui tŏng ten, pel ĕp kơjăp, pơhlôm bôh yôm 5 mơta tơlơi; hrom hăng anun, Khua git gai wai lăng pơ ala mơnuih ƀôn sang dêh čar ăt pơtă mơn, Khua pơ ala mơnuih ƀôn sang amra kơnong kơ pel ĕp lu biă ñu 5 mơta tơlơi mơ̆ ƀu djơ̆ khom ngă djop ôh tơdah tơlơi anai hmâo anô̆ kơjăp prăp lui ƀu pơhlôm tơlơi kiăng yua hăng ƀu pơhrua nao dong hơdôm bôh yôm pơkon./.

Siu H’ Prăk: Pô pơblang