VOV4.Jarai -  Čơtlăm lơ 25/10, ƀơi Sang mă bruă Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo git gai bruă mă hăng hơdôm bôh ƀirô bơdjơ̆ nao kơ bruă bơwih kơ tal jơnum lok sa, Khua pơ ala mơnuih ƀôn sang tal 15 amăng rơwang hrơi rơjuh jơnum phrâo rơgao.

Pơhiăp amăng mông mă bruă, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, hơdôm hrơi rơgao Khua pơ ala mơnuih ƀôn sang hmâo ngă giong laih jơlan hơdră ba tơbiă, pơpha jơlan hơdră djơ̆, hmâo akô̆ tlôn, mă yua đut tơhnal hơdôm hrơi mông bơkơtuai ƀơi grŭp hăng sang rông, abih bang tơlơi rơkâo mơng ƀing khua pơ ala mơnuih ƀôn sang leng kơ dưi lăi pơthâo. Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, pơ̆ anăp anai, Khua pơ ala mơnuih ƀôn sang amra gum pơhiăp kơ 5 rơwang bruă tơlơi phiăn hăng akô̆ bruă prong, anun lĕ dăp glăi bruă bơwih ƀong hăng pơkă kual mă yua lŏn mơng thun 2021-2030, tơhnal lăng nao truh kơ thun 2050 hăng kơčăo bruă mă yua lŏn 5 thun (2021-2025), anai lĕ hơdôm tơlơi bơdjơ̆ nao truh tơlơi hơdip mơda bơwih ƀong huă. Yua anun, hơdôm bôh ƀirô pôr pơhing kiăng lăi pơthâo djop, phun, bôh yôm; hơdôm bôh ƀirô mơng Khua pơ ala mơnuih ƀôn sang kiăng kơsem min, bơkơtuai tŏng ten, mă tơlơi gum pơhiăp mơng ƀing khua pơ ala mơnuih ƀôn sang./.

Siu H’ Prăk: Pô pơblang