VOV4.Jarai -  Čơtlăm lơ 30/8, ƀơi Sang mă bruă Khua pơ ala mơnuih ƀôn sang dêh čar ta, Khua git gai wai lăng pơ ala mơnuih ƀôn sang ơi Vương Đình Huệ bơkơtuai lăng nao rai mơng ataih hăng Khua git gai wai lăng pơ ala mơnuih ƀôn sang dêh čar Thái Lan Chuan Leekpai. Amăng mông bưp gưl dlông hăng hơdôm gưl, biă ñu hơdôm hơdră gum hrom dua bơnah hmâo ră anai.

Hrom hăng anun tañ ngă giong hăng kĭ pơkôl Jơlan hơdră bruă ngă pok pơhai tơlơi gum hrom kơtưn đĭ rơwang mơng thun 2021-2025; pơtrut tañ bơkơtuai, kĭ pơkôl hơdôm hră pơ-ar djơ̆ phiăn yôm phăn kah hăng Tơlơi pơkôl ba nao mơnuih phăt kơđi, Tơlơi pơkôl gum djru tơlơi phiăn amăng bruă dân sự. Gah tơlơi rô nao rai dua bơnah Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dua bôh dêh čar leng kơ lăi lĕ, dua bơnah khom kơtưn bơkơtuai nao rai gah khua mua gưl dlông hăng gưl Jơnum min, gum hrom kơplah wah hơdôm bôh ƀirô juăt bruă mơng dua Khua pơ ala mơnuih ƀôn sang. Dua Khua pơ ala mơnuih ƀôn sang gum hrom kơjăp amăng hơdôm bruă bơkơtuai ƀơi kual hăng jar kơmar; dŏng yua tơlơi pơmin tơdruă kơ hơdôm tơlơi ƀơi kual hăng jar kơmar hơdai bơđing nao./.

Siu H’ Prăk: Pô pơblang