VOV4.Jarai -  Mơguah lơ 31/8, ƀơi Sang Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ git gai mông jơnum lok sa Grŭp pơdŏng akô̆ bruă kơ “Pơdŏng, ngă giong glông bruă tơlơi phiăn hăng pơphun ngă tui tơlơi phiăn truh thun 2030, pơsit jơlan gah truh thun 2045 djơ̆ hăng tơlơi kiăng pơdŏng ngă giong kơnuk kơna hmâo tơlơi dưi pô djop mơnuih dưm kơnar Việt Nam”, (iâu klah čun lĕ Grŭp mrô 1).

Amăng mông jơnum ƀing ding kơna mơng Grŭp mrô 1 hmâo gum pơhiăp hơdôm bôh yôm  Khua git gai wai lăng pơ ala mơnuih ƀôn sang dêh čar ta ơi Vương Đình Huệ pok tơbiă, anun lĕ rơwang kơsem min, hơdră ngă tui kiăng pơphun hơdôm bruă bơkơtuai, iâu pơhrui tơlơi gum hrom bôh thâo mơng lu bơnah, mơnuih juăt bruă, khom mă yua djơ̆ hrom tơlơi găn rơgao mơng hơdôm bôh dêh čar, mă yua bôh than dưi ngă mơng hơdră phrâo măi mok 4.0. Gum pơhiăp amăng mông jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo, grŭp čih dăp hơdră tŭ mă lu tơlơi gum pơhiăp mơng hơdôm ding kơna Grŭp mrô 1; mă yua hơdôm bôh tơhnal mơng hơdôm bruă klah čun, pơhlôm tơhnal tŭ mă, hơduah lăng tơlơi găn rơgao jar kơmar; hluai tui anun pơlar đĭ tơlơi hăng ba tơbiă hơdôm tơlơi phrâo hmâo tơhnal dưi ngă, djơ̆ hrom prong./.

Siu H’ Prăk: Pô pơblang