VOV4.Jarai - Čơtlăm mơmot tom brơi (7/7), ƀơi Sang mă bruă Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ bơkơtuai lăng nao rai amăng tivi hăng Khua git gai wai lăng pơ ala mơnuih ƀôn sang gơnong yŭ dêh čar Marocco Habid El Malki.

Amăng mông bơkơtuai, dua gơñu lăi rơđah, Việt Nam hăng Marocco hmâo tơlơi rô nao rai giăng mah mơng hlâo klă hiam, dua bôh dêh čar khă anih anom dô̆ ataih nao rai samơ̆ hmâo lu tơlơi hơhrup gah gru grua hăng lom pơđĭ kyar, hơdai bơ dêh čar glăk đĭ kyar, ding kơna gah Khul ƀu pơlir hơbit hăng Khul mơnuih yua tơlơi Prang. Anai lĕ tơhnal gal kơ bruă pơđĭ kyar gum hrom dua bơnah amăng hơdôm bruă pơ̆ anăp anai. Dua bơnah ngă tui dong bruă gum hrom kơjăp amăng hơdôm mông bơkơtuai lu bơnah kah hăng IPU, APF hăng hơdôm khul mă bruă Khua pơ ala mơnuih ƀôn sang lu mơta pơkon; dŏng yua tơlơi pơmin tơdruă kơ hơdôm tơlơi amăng kual hăng jar kơmar hơdai bơ đing nao. Gum hrom pel ĕp, lăng tui bruă ngă tui hơdôm tơlơi pơkôl hăng tơlơi tŭ ư hrom hmâo kĭ laih kơplah wah Kơnuk kơna hăng hơdôm Ding jum gơnong bruă dua bôh dêh čar, kiăng hơdôm tơlơi pơkôl pơkă dưi pok pơhai ha amăng plĕ, ba glăi bôh tơhnal hăng bôh tŭ yua sit nik, djơ̆ hăng tơlơi rô nao rai bruă kơđi čar klă hiam kơplah wah dua bôh dêh čar./.

Siu H’ Prăk: Pô pơblang