VOV4.Jarai -  Ƀơi plơi prong jưh jom Brussel, dêh čar Bơl-gum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo bơkơtuai hăng Khua Khul kual Mi Kô̆ Charles Michel. Pơsit yôm bôh yua tal nao čuă hăng mă bruă ƀơi EU tal anai mơng grŭp khua pơ ala gưl dlông Khua pơ ala mơnuih ƀôn sang dêh čar Việt Nam tơdơi kơ hơdôm hrơi bơdjơ̆ nao klin ngă, Khua EC lăi lĕ, klin ruă Covid-19 ngă glêh tơnap ƀơi đơ đam rŏng lŏn tơnah hmâo bơdjơ̆ nao rơnoh hăng bôh tơhnal mơng bruă ngă tui tơlơi pơkôl AVFTA; lăi rơđah pơ̆ anăp dua bơnah khom mă yua abih tơhnal gal prong prin mơ̆ tơlơi pơkôl anai ba glăi. Khua Khul kual Mi Kô̆ lăi pơthâo tơlơi pơmin kơ rơnuk rơnua hăng pơhlôm hơđong Ấn Độ Dương – Thái Bình Dương, phiăn pơpŭ tơlơi phiăn hăng pơsit EU čang rơmang pok prong hăng ngă dơlăm hloh gum hrom hăng kual Đông Nam Á, amăng anun hmâo Việt Nam. Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơsit, Việt Nam gum hrom kơjăp dong hăng EU hăng EP ƀơi hơdôm hơdră gum hrom lu bơnah, amra gơgrong ngă glông tô pơtrut tơlơi rô nao rai EU hăng ASEAN djơ̆ hăng rơwang pơkă Gum hrom bruă ASEAN-EU phrâo kĭ pơkôl./.

Siu H’ Prăk: Pô pơblang