VOV4.Jarai - Tlam lơ 21/10, ƀơi Anih pôr pơhiăp Dêh čar, mrô sang 58 Quán Sứ, Hà Nội, Ding kơna Ping gah, Khua Gong phun pơtui jua pơhiăp Việt Nam ơi Đỗ Tiến Sỹ hơmâo čơkă Khua grup Anom bruă pơ ala Việt Nam ƀơi dêh čar tač rơngiao yua Kơ-iăng khua ding jum pơtom hiăp Vũ Quang Minh ba jơlan rai čuă hăng ngă bruă. Ƀơi mông ngă bruă, Khua gong phun jua pơhiăp Việt Nam ơi Đỗ Tiến Sỹ hơ-ơč hmưi kơ ƀing khua Anom bruă pơ ala Việt Nam ƀơi dêh čar tač rơngiao hơmâo ruah ngă bruă yôm. Ơi Đỗ Tiến Sỹ ăt pơƀuh tum teč kơ Gong phun jua pơhiăp Việt Nam, lăi nao tơlơi ngă hrŏm kơplah wah Gong phun jua pơhiăp Việt Nam hăng Ding jum pơtom hiăp hăng tač rơngiao, hơdôm Sang anih jưh pơ ala dêh čar hăng Khua anih jưh pơ ala dêh čar Việt Nam ƀơi dêh čar tač rơngiao amăng bruă pôr tơlơi pơhing. Amăng hrơi blan pơ anăp, Gong phun jua pơhiăp dêh čar Việt Nam kiăng ngă hrŏm kơjăp hloh hăng hơdôm anom bruă pơ ala Việt Nam pơ tač rơngiao amăng bruă pôr tơlơi pơhing dêh čar tač rơngiao kiăng pơƀuh dlăm hloh rup lŏn ia, ană mơnuih Việt Nam kơ abih bang dêh čar thâo, ăt kah hăng pok prong tơlơi ngă hrŏm hăng ƀing gŏp pơ dêh čar tač rơngiao gah bruă pôr pơhing pơdah rup.

Siu H’Mai: Pơblang