VOV4.Jarai - Mơguah lơ 23/12, Grŭp pơtô bruă Ping gah dêh čar ta pơphun Jơnum đơ đam dêh čar Klah čun bruă pơtô juăt Ping gah thun 2021 hăng pok pơhai bruă mă thun 2022. Jơnun dưi pơphun tui hơdră ƀơi anăp hăng lăng nao rai mơng ataih ƀơi hơdôm anih tô nao rai amăng đơ đam dêh čar.

Thun 2021 hăng pran jua gơgrong hlâo, pơsit pran jua prong, kiăo tui tơlơi črâo ba mơng Ding jum kơđi čar, Grŭp git gai bruă Ping gah hăng hơdôm gưl Ping gah, abih bang anom pơtô bruă Ping gah hmâo pơplih phrâo jơlan gah, pok pơhai abih bang hơdôm bruă mă, ngă giong klă bruă jao. Mơng anun, djru yôm phăn ngă tui truh kih hơdôm bruă kơđi čar mơng hơdôm gưl, gong gai, Jơnum min djop djuai ania mơnuih mơnam dêh čar hăng hơdôm khul grŭp kơđi čar – mơnuih mơnam. Pơhiăp amăng mông jơnum, Khua Grŭp git gai ping gah dêh čar ơi Võ Văn Thưởng rơkâo, pơ̆ anăp anai gơnong bruă pơtô bruă Ping gah kiăng pơplih phrâo dong, pơđĭ tui anô̆ klă, bôh tơhnal bruă pơtô juăt Ping gah ƀơi hơdôm gưl. Gum hrom klă pơdŏng ping gah kơjăp phik gah kơđi čar, tơlơi pơmin, pran jua. Ơi Võ Văn Thưởng rơkâo khom pơtrut kơtang bruă kơsem min, hrăm tui, lăi pơthâo abih, lăi pơhing, pok pơhai ngă tui Tơlơi pơtrun pơsit Jơnum prong tal 13 hăng hơdôm Tơlơi pơtrun pơsit, črâo ba klah čun tơlơi pơkă mơng Ping gah./.

Siu H’ Prăk: Pơblang