VOV4.Jarai - Tlam lơ 15/10, Khua gum bruă git gai Ping gah ơi Võ Văn Thưởng hơmâo mông pơhiăp tom mơng ataih hăng Khua gum bruă git gai Ping gah Mơnuih ƀon sang Kač mang Lao - Kơ-iăng khua mir sir Cộng hoà Dân chủ Nhân dân Lao. Dua bơnah bơlăi nao rai kơ tơlơi hơmâo mơng Ping gah, kơnuk kơna; lăi pơthâo bruă akŏ pơjing Ping gah, akŏ pơjing anom bruă čar, bruă pơgăn hưp ham ƀong kông ngăn, bruă hyu pel ĕp, wai lăng, jăm ƀuah ƀing ngă soh amăng Ping gah hăng hơdôm hơdră pok pơhai Tơlơi pơtrun Jơnum mơng rim Ping gah. Dua čô khua ăt bơlăi nao rai tơlơi thâo rơgơi amăng bruă pơhlôm pơgang klin Covid-19 hăng bruă bơwih ƀong huă mơnuih mơnam ƀơi rim boh dêh čar amăng hrơi blan rơgao; lăi mah dŏ tơnap samơ̆ dua bơnah lêng pơdjru nao rai tañ, tŭ yua, pơdah pran jua khăp ƀu-eng mơng adơi ayong hăng gru grua khăp pap ƀu-eng kơplah wah dua djuai ania Việt Nam - Lao.

Siu H’Mai: Pơblang