VOV4.Jarai-Tlam lơ 28/7, hrơi mă bruă rơnuč jơnum lok sa, khua mua pơ ala mơnuih ƀôn sang dêh čar tal XV, hơmâo pơsit hĭ hră pơtrun ruah khua amăng ding kơna kơnuk kơna rơwang bruă tal XV mơ̆ng khua mua pơ ala mơnuih ƀôn sang dêh čar, hơmâo 27 čô khua ding jum, anom bruă amăng kơnuk kơna: Khua dêh čar hăng 4 čô kơ-iăng khua dêh čar; 18 čô khua ding jum hăng 4 čô khua anom bruă bơkơnar hăng ding jum.

Khua mir sir jao hră pơđĭ khua mua amăng kơnuk kơna dêh čar

Tlam mơmŏt lơ 28/7, Khua mir sir ơi Nguyễn Xuân Phúc hơmâo ƀơk hră pơsit bruă ngă khua kơ ding kơna amăng kơnuk kơna.

Pơhiăp ƀơi mông jao hră, pơ ala kơ khua mua ping gah, kơnuk kơna Khua mir sir ơi Nguyễn Xuân Phúc bơni hơ-ơč kơ Khua dêh čar ơi Phạm Minh Chính, hơdôm kơ-iăng khua dêh čar, ƀing khua ding jum hăng khua anom bruă bơkơnar hăng ding jum, lăng yôm bruă mă mơ̆ng hrơi ruah glăi khua mua pơprong amăng kơnuk kơna truh ră anai aka ƀu lu ôh samơ̆ ƀing khua mua amăng kơnuk kơna yua kơ Khua dêh čar ơi Phạm Minh Chính git gai hơmâo ngă bruă hmao kru djơ̆ tơlơi kiăng, kơtang hloh, sa pran jua pơsir lu tơlơi kiăng; hơmâo pơƀuh sa khul khua mua mă bruă hrom hơbit pơsit mă bruă khut khăt.

Nay Jek: Pơblang