VOV4.Jarai-Tlam lơ 3/8, ƀơi Anom bruă khua mir sir, ơi Nguyễn Xuân Phúc Khua mir sir hơmâo bưp ƀing ba gru hlâo amăng bruă ngă dua bruă pơtrun mơ̆ng anom bruă tơčoh sum ao rơwơi mơñam Việt Nam. Pơhiăp hrom amăng mông bưp, Khua mir sir ơi Nguyễn Xuân Phúc mơ-it hiăp tơña bla truh pơ abih bang mơnuih mă bruă apah ƀong prăk blan, amăng anom bruă tơčoh sum ao rơwơi mơñam Việt Nam hlăk bưp tơlơi tơnap tap yua klin kheng Covid 19 ngă.

Khua mir sir tơña bla truh pơ abih bang mơnuih ngă kông ñơn gah anom bruă tơčoh sum ao

Khua mir sir lăi pơtong, amăng hrơi blan hlăk hơmâo klin, tơdah djop anom bruă lêng kơ pơdơi abih bruă mă, lŏn ia ta amra bưp tơlơi tơnap tap ƀu ƀiă ôh.

Yua kơ anun, hơdôm ƀing ngă bruă ba gru hlâo mơ̆ng anom bruă tơčoh sum ao rơwơi mơñam Việt Nam hơmâo pơthâo brơi ƀuh, amăng mông tơnap tap ăt hơmâo mơ̆n gru mơnuih hrưn đĭ, mă bruă găn rơgao tơlơi tơnap tap, hơmâo hơbô̆ bruă ba glăi boh tŭ yua hăng pơgang tơlơi suaih pral kơ mơnuih mă bruă apah, ăt pơphun bruă mă hơđong, pơgang ba tơlơi hơdip mơda mơ̆ng mơnuih mă bruă.

Abih bang anom bruă anai ăt hơmâo mơ̆n 209 čô mơnuih F0, brơi ƀuh anun lĕ hơdră mă bruă rah, pơhlôm pơgang klin rah, sa hơbô̆ bruă lăp ngă gru kơ anom bruă pơkŏn.

Nay Jek: Pơblang