VOV4.Jarai - Tŏ tui hơdôm bruă hơmâo ƀơi New York dêh čar Mi, Khua mir sir hơmâo mông bưp, pơhiăp tom hăng ƀing khua mua mơng hơdôm boh dêh čar, bưp lăng nao rai amăng tivi Khua git gai pơ ala mơnuih ƀon sang gơnong dlông dêh čar Mi. Khua mir sir ơi Nguyễn Xuân Phúc ăt hơmâo mông pơhiăp tom hăng khua mua mơng dêh čar lĕ Ding kơna mơng Khul pơgang rơnuk rơnua Sang gum hơbit djŏp dêh čar. Bơkơtuai hăng khua pơ ala dêh čar Nga,  Khua mir sir ơi Nguyễn Xuân Phúc pơsit, dêh čar Nga lĕ sa amăng hơdôm dêh čar ngă hrŏm prong hloh mơng Việt Nam. Pơ anăp anai, khua mua dua boh dêh čar amra tañ bơbưp ƀơi anăp đah mơng pơtrut hloh dong tơlơi rô nao rai ngă gŏp kơplah wah Việt Nam hăng Nga. Amăng mông bơkơtuai hăng Khua ding jum pơtom hiăp dêh čar Mi ơi Antony Blinken, Khua mir sir ơi Nguyễn Xuân Phúc bơni kơ dêh čar Mi yua jing sa amăng hơdôm boh dêh čar djru vaccine pơgang Covid-19 lu hloh kơ hơdôm boh dêh čar kiăo tui hơdră djru COVAX. Hlâo kơ anun, Khua mir sir ơi Nguyễn Xuân Phúc hơmâo mông bưp hăng Bơnai ơi pơtao Hà Lan Maxima, pô pơ ala yôm mơng Khua čih pioh Sang gum hơbit djŏp dêh čar kơ prăk kăk; tŭ jum Khua Sang bruă prăk jar kmar (IMF) Kristalina Georgieva hăng lu anom bơwih ƀong prong ƀơi dêh čar Mi dong.

Siu H’Mai: Pơblang