VOV4.Jarai - Ƀơi plơi prong jưh jom Moscow, Khua mir sir ơi Nguyễn Xuân Phúc hăng bơnai ñu hơmâo nao čuă hăng bưp mơnuih apăn bruă, mơnuih mă bruă amăng Sang anih jưh pơ ala dêh čar, hơdôm anom bruă pơ ala dêh čar Việt Nam ƀơi Nga. Đĭ pơhiăp amăng mông bưp, Khua mir sir ơi Nguyễn Xuân Phúc pơpŭ bơni, lăng yôm hơdôm bruă prap lui pơphun tal nao čuă anai mơng Ding jum pơtom hiăp, djop ding jum, gơnong bruă hăng sit biă ñu lĕ ƀing mơnuih apăn bruă, mơnuih mă bruă amăng sang anih jưh pơ ala dêh čar Việt Nam ƀơi Nga. Khua mir sir pơtă ƀing apăn bruă, mơnuih mă bruă amăng Sang anih jưh pơ ala mơnuih ƀon sang Việt Nam ƀơi Nga hơmâo ngă tui klă Tơlơi pơtrun mrô 12 mơng Kơnuk kơna phrâo anai kơ bruă mơnuih ƀon sang  Việt Nam pơ tač rơngiao pơ anăp anai; ngă tui klă bruă wai lăng ba mơnuih ƀon sang, djru brơi tơlơi hơdip kơ mơnuih ƀon sang Việt Nam kiăng kơ jai hrơi hơmâo lu dong bruă mă sit nik mơng neh met wa djru brơi plơi pla, pơgôp pơjing lŏn ia ta.

Siu Đoan: Pơblang