VOV4.Jarai - Tlam lơ 8/10, ƀơi Hà Nội, Khua mir sir dêh čar ơi Nguyễn Xuân Phúc hơmâo nao lăng mông jao miđai Tơhan sông kơtang brơi kơ Grup hlăk ai pơklaih rơngai lŏn ia Thành Hoàng Diệu; jơlan hơdră pơpŭ kơ ƀing mơnuih hơdip hiam, ngă bruă klă hăng pơpŭ mơnuih ƀon sang amăng plơi prong jưh jom hơdip ba gru thun 2021 amăng ƀôn prong Hà Nội. Jơlan hơdră hơmâo pơphun lăng nao rai mơng ataih hăng rơbêh 80 anih lăng nao rai amăng đơ đam bôn prong Hà Nội. Pơ ala brơi khua mua Ping gah, Kơnuk kơna, Khua mir sir ơi Nguyễn Xuân Phúc hơmâo jao miđai Tơhan sông kơtang brơi grup hlăk ai pơklaih rơngai lŏn ia Thành Hoàng Diệu. Amăng gru grua blah ngă ƀơi plơi prong jưh jom Hà Nội, hơdôm tơlơi gum pơgôp prong prin mơng grup hlăk ai pơklaih rơngai lŏn ia Thành Hoàng Diệu hơmâo hơdor tơngia na nao. Tŏ tui gru grua hơdôm khul grup hlăk ai mơng đưm đă ră hlâo, amăng hơdôm thun laih rơgao, hlăk ai ƀôn prong hơmâo abih pran jua amăng djop mơta bruă, pơgôp amăng bruă pơjing plơi prong jưh jom lĕ ƀôn prong thâo pơčeh phrâo, yua kơ tơlơi rơnuk rơnua, gru grua hiam klă tŏ tui na nao amăng hơdôm rơbâo thun. Amăng mông ngă lơphet, ƀôn prong Hà Nội ăt hơmâo pơpŭ ƀing mơnuih ba gru hiam hăng pơpŭ 9 čô mơnuih ƀon sang plơi prong jưh jom rơgơi kơhnâo amăng djop mơnuih bruă thun 2021.

Siu Đoan: Pơblang