VOV4.Jarai - Lơ 30/7, ƀơi ƀôn prong Hồ Chí Minh, Khua mir sir dêh čar ta ơi Nguyễn Xuân Phúc mă bruă hăng khua mua amăng ƀôn prong Hồ Chí Minh. Khua mir sir lăi pơtong hơnong pơkă blung hlâo, yôm phun ră anai lĕ pơgang brơi tơlơi suaih pral kơ mơnuih ƀon sang, kiăng aset hloh mơnuih djai yua kơ klin ngă. Tui anun bruă yôm phăn lĕ kiăng ngă tui tơlơi črâo trun mrô 16, tơdah kiăng ngă klă khŏm bơwih brơi tơlơi hơdip kơ mơnuih ƀon sang, anăm brơi mơnuih ƀon sang kơƀah gơnam ƀong huă. Hăng ƀôn prong rơbêh 10 klăk čô mơnuih kar hăng ƀôn prong Hồ Chí Minh, bruă pơgang klin tơnap tap biă mă, Khua mir sir dêh čar ta pơpŭ ƀing khua mua, djop anom bruă kơđi čar amăng ƀôn prong Hồ Chí Minh hơmâo hơdôm tơlơi pơtrun hmao tlôn, lăp djơ̆ hăng tơlơi sit nik kiăng pơgang klin, hmao tlôn ngă tui hơdôm hơdră djru brơi mơnuih mơnam, laih dong man pơdong phrâo 16 sang ia jrao pơjrao mơnuih ƀă klin prong hloh, hăng dưm abih bang 50 rơbâo boh sưng. Amăng mông mă bruă, Khua mir sir dêh čar brơi thâo hơmâo jak iâu ƀing mơnuih čơmah amăng dêh čar hăng tač rơngiao djru brơi ƀôn prong Hồ Chí Minh lĕ 103 klai prăk hăng 10 boh măi suă jua hăng lu gơnam gah ia jrao. Amăng anun, sang bruă prăk hơmâo djru brơi 50 klai prăk, sang bruă prăk Sacombank djru 30 klai prăk, anom bơwih ƀong sĭ mơdrô tač rơngiao djru 1 klăk đôlar Mi.

Siu Đoan: Pơblang