VOV4.Jarai -  Čơtlăm lơ 2/11, ƀơi tơring čar Ninh Bình, Khua mir sir dêh čar ta ơi Nguyễn Xuân Phúc mă bruă hăng Khua mua phun mơng tơring čar Ninh Bình kơ ngă tui hơdră pơtrun, hơdră bruă mơng Ping gah hăng tơlơi phiăn mơng Kơnuk kơna kơ pơđĭ kyar bơwih ƀong – mơnuih mơnam hăng bơwih ƀong khul, anom mă bruă hrom. Pơhiăp amăng mông mă bruă, Khua mir sir dêh čar lăi lĕ, rơngiao kơ tơlơi gum djru mơng hơdôm anih anom kơ hơdôm bôh anom mă bruă hrom gah prăk kak, hơdră phrâo kah hăng ră anai lĕ, kiăng djru hơdôm bôh anom mă bruă hrom gah pơphun bruă kiăng hmâo sa hơdră pơhun phrâo, tui jơlan phrâo, hrưn đĭ hloh tơlơi pơmin kơ hơdră anom mă bruă hrom mơng hlâo. Khua mir sir dêh čar rơkâo hơdôm anih anom amăng tơring čar klah čun dong Tơlơi pơtrun pơsit mơng Ping gah dêh čar; đing nao djru gum hơdră bruă, ngăn rơnoh, tơhnal gal pioh anom mă bruă hrom đĭ kyar; djru prăk pơtô pơhrăm, tŭ mă bôh thâo, hơdră phrâo kơ hơdôm mơnuih amăng anom; Pơtrut pơsur hơdôm sang prăk sĭ mơdrô pioh ngăn rơnoh kơ hơdôm bôh anom mă bruă hrom. Hăng pran jua anun, Khua mir sir rơkâo Ding jum kơčăo bruă hăng tuh pơplai, Khul pơlir hơbit anom mă bruă hrom Việt Nam hăng hơdôm bôh ƀirô bơdjơ̆ nao gum hrom hăng hơdôm anih anom klah čun dong 20 thun ngă tui Tơlơi pơtrun pơsit mrô 13 kơ bơwih ƀong anom mă bruă hrom, bơwih ƀong grŭp./.

Siu H’ Prăk: Pô pơblang