VOV4.Jarai -  Ƀrô djơ̆ tal, Jơnum Khul pơlir hơbit Khua pơ ala mơnuih ƀôn sang hơdôm bôh dêh čar kual ASEAN tal 42 (AIPA-42) sit nik pok pơhai tui hơdră lăng nao rai mơng ataih, pơ ala kơ Kơnuk kơna hăng mơnuih ƀôn sang dêh čar Việt Nam, Khua mir sir dêh čar ơi Nguyễn Xuân Phúc hmâo Tơlơi lăi pơthâo čơkă mơ-ak mơ-ĭt truh kơ Jơnum Khul AIPA-42.

Khua mir sir dêh čar lăi rơđah, Jơnum Khul AIPA-42 dưi pơphun amăng mông rŏng lŏn tơnah hăng ƀơi kual glăk gơgrong ba bơbeč prong mơng klin Covid-19, bơdjơ̆ nao prong truh pơđĭ kyar bơwih ƀong – mơnuih mơnam hăng tơlơi hơdip mơnuih ƀôn sang ƀơi hơdôm bôh dêh čar. Amăng rơwang tơnap tap, tơlơi lông ră anai, Khua mir sir dêh čar biă ñu lăi rơđah tơhnal yôm phăn mơng glông bruă khua pơ ala mơnuih ƀôn sang hơdôm bôh dêh čar kual ASEAN, hluai tui AIPA hăng ƀing Khua pơ ala mơnuih ƀôn sang ding kơna kah hăng sa phun tơmeh gơgrong gum hrom klă hăng djru nao rai ba glăi bôh tơhnal kơ tơlơi gir run mơng hơdôm kơnuk kơna hơkrŭ đĭ pran kơtang abih bang mơng ASEAN yak rơgao tơlơi tơnap, ngă tui truh kih dong hơdôm tơhnal pơkă pơdŏng khul./.

Siu H’ Prăk: Pô pơblang